我地有份寫既書已經出版﹐可以係各大書局買到啦﹗
http://www.gccd.com.hk/booklist_single.asp?bid=3227

姪女Sa Sa越黎越得意﹐我同佢嬸嬸晚晚都趕住返佢嫲嫲到食飯﹐同佢玩下﹐星期六日又成日借D意同佢食晏﹐見下佢。琴日我又上左Sa Sa屋企食晏﹐同佢玩左兩個鐘﹐佢係自己屋企鍾意自己玩多﹐成日摷D玩具出黎﹐玩兩玩又放埋一邊﹐又鍾意玩D唔係玩具既野﹐好似廁紙呀﹐盒呀﹐紙碎咁﹐真係搞笑。

睇住Sa Sa一日一日咁大﹐識野越黎越多﹐我同佢嬸嬸都越黎越鍾意佢。

http://hk.myblog.yahoo.com/gracelau28

琴晚同左一個朋友出去食飯﹐傾左好多野﹐我亦都有同佢講返之前發生既事﹐其實係上一次事件發生之後﹐我係知道我本身有做得唔好既地方﹐琴晚同朋友再傾﹐佢都再提返﹐女仔係思想上或者情緒上﹐要求既野同男仔可能會好唔同﹐佢地其實係希望得到情緒上既安慰﹐而唔係一D理性上既分析﹐我的確係呢方面做得唔好﹐未能夠體諒到佢當時既心情﹐我希望以後可以做得好D。

另外﹐我亦都同朋友講左佢去半年旅行既計劃﹐朋友問我有冇擔心﹐放唔放心佢去咁耐﹐我其實都好放心。係佢講俾我聽呢個計劃個時﹐我其實有D唔開心﹐因為呢樣唔係我所追求既野﹐同樣﹐佢知道左我唔同佢一齊去既時候﹐佢都有D唔開心﹐不過﹐當大家已經決定左﹐係呢一刻﹐我冇任何唔開心﹐亦都好支持佢咁做﹐因為佢找到一D自己想做既野﹐呢樣都係值得高興既事。

自從上一次既事到而家﹐我都仲係有D迷惘﹐係呢段時間﹐我都有諗其實自己追求既係咩野﹐暫時我未找到答案﹐但係﹐我會嘗試﹐睇下會唔會有D咩既改變。

朋友最後都俾左個建議俾我﹐叫我係佢長旅行既中間同佢一齊玩一段短時間﹐我都覺得幾好﹐睇下到時安唔安排到啦。

呢一切對我黎講﹐都發生得太快﹐係一個月前﹐大家仲係好開心咁去緊旅行﹐甚至返到香港﹐我都唔覺得兩個人之間有咩問題﹐但係原來﹐佢對我既感覺已經唔同左。

可能我真係諗得太簡單﹐認為兩個人生活﹐只要對對方坦誠﹐體諒對方﹐關心對方﹐就已經足夠﹐我唔知原來佢對我其實有咁多要求﹐希望我可以係工作上幫佢﹐希望我係工作上有所成就﹐我唔係一個咁有野心既人﹐生活對我黎講可以好簡單﹐每日返工放工﹐放左工見到自己心愛既人﹐放假去下旅行﹐就係咁已經好好﹐雖然我對自己既工作都唔係咁滿意﹐但係我唔會刻意去同人比較﹐亦都有盡力去改善﹐如果要我好刻意去改變我宜家做緊既野﹐我其實唔係好想。

我記得曾經同佢講過﹐就算佢辭工唔做都冇問題﹐只要大家將生活要求降低﹐甚至生BB都可以﹐我希望做到既係﹐大家都可以坦誠﹐冇野係唔可以同對方商量。

去到呢一刻﹐我唔知大家既關系發展落去會點﹐我地由拍拖到宜家已經十二年﹐我一路都覺得﹐我係事業上遇到好多唔好彩既事﹐但係同佢一齊﹐係我呢一生最幸運既事﹐我亦都好珍惜同佢所有既野﹐我係我﹐由第一日識佢開始到宜家﹐我唔覺得自己有咩改變﹐我唔知佢係咪要求我有所改變﹐佢有太多我唔知既野﹐我唔知點可以去了解佢﹐去幫佢﹐佢如果唔講出黎﹐我真係唔知應該點做。

由上星期開始﹐大家既關係變得好疏離﹐真正既原因我都唔清楚﹐只係隱約估到﹐佢公司既competitor出左新產品﹐佢覺得對方用一D唔正確既資訊去做廣告﹐令到佢覺得唔忿氣﹐所以攪到佢情緒低落。佢以前都試過因為工作壓力大而唔開心﹐不過都係喊下就冇野﹐未試過好似呢排咁﹐日日都口黑面黑﹐我地亦都冇左好似以前咁開懷既關係﹐可以扮下細路﹐講埋D低能野。

我成日都覺得﹐應該將工作同生活分開﹐唔好俾工作影響到生活﹐畢竟﹐工作只係生活既一部份﹐而唔係全部﹐可能講好易﹐亦未必個個人都做到﹐只可以講睇你睇唔睇得開。

安慰既說話﹐我唔識點講﹐我有嘗試去問佢點解唔開心﹐但得唔到回應﹐當一個人成日對住你都口黑面黑﹐你都唔會開心﹐我唔知係咪呢排既情緒﹐影響到佢做左某D重要既決定﹐亦都唔知將來佢會唔會改變主意﹐佢不嬲都係一個好獨立既人﹐佢要做既野﹐冇人可以改變到佢既決定﹐我只希望佢做決定既時候﹐有時可以諗下對其他人既影響﹐我唔清楚係佢潛意識入面﹐會唔會知道有個人係好關心佢﹐亦都會俾佢做既野影響﹐希望佢可以再次開心﹐快樂﹐就係咁已經足夠。